- 1/1
Kystmuseet i Øygarden feirar 30 år
I år feirar Kystmuseet i Øygarden 30 år. Tenk det – 30 år med museum i Ovågen!
Sidan opninga har museet vore ein viktig møteplass for formidling av kystkultur, historie og tradisjonar, og gjennom tre tiår har både store og små fått oppleve og lære meir om livet ved kysten.
På sjølve jubileumsdagen, 15. juni, hadde vi ei lita markering. No ønskjer vi å invitere deg med på den store feiringa. Vi har sett av ei heil veke til feiringa, og på programmet står mellom anna forteljarkveldar, kino og musikalsk framsyning, og ikkje minst ein kulturhistorisk båttur med Vestgar.
Museet og kystkulturen står naturleg nok i sentrum gjennom heile veka – og med eit særleg fokus på kystkvinna. Her blir det aktivitetar, arrangement og gode møte som løftar fram historia vår og livet langs kysten, samstundes som vi ser framover mot nye år med formidling og engasjement.
Vi håpar du finn eitt, eller kanskje fleire, arrangement du har lyst til å vere med på, og at du vil vere med oss når vi feirar 30 år med Kystmuseet i Øygarden.
Velkomen til jubileumsveka!